खबर सर्कल
बेलबारी (मोरङ), २० असारः मोरङको लेटाङ नगरपालिकामा आज दिउँसो विद्युतीय रिक्सा दुर्घटना हुँदा एक महिलाको मृत्यु भएको छ भने अन्य तीन जना घाइते भएका छन् । कानेपोखरीबाट लेटाङ बजारतर्फ जाँदै गरेको विद्युतीय रिक्सा फारलाइन क्षेत्रमा अनियन्त्रित भई दुर्घटना भएको इलाका प्रहरी कार्यालय लेटाङले जनाएको छ ।
दुर्घटनामा गम्भीर घाइते भएकी लेटाङ–४ सिद्धार्थ लाइन निवासी ६० वर्षीया सञ्चमाया लावतीको उपचारका क्रममा नोबेल मेडिकल कलेज टिचिङ हस्पिटल, विराटनगरमा मृत्यु भएको इलाका प्रहरी कार्यालय लेटाङका प्रहरी निरीक्षक सागर साहले जानकारी दिनुभयो ।
दुर्घटनामा सिटी सफारीमा सवार अन्य तीन जना घाइते बन्नुभएको छ । उहाँहरूको स्थानीय अस्पतालमा उपचार भइरहेको प्रहरीले जनाएको छ । सिटी सफारी चालक लेटाङ–४ निवासी ३७ वर्षीय वीरबहादुर राईलाई प्रहरीले नियन्त्रणमा लिएको छ भने दुर्घटनाबारे थप अनुसन्धान भइरहेको प्रहरीले जनाएको छ ।
R.S.S
© 2026 All right reserved to nepalcircle.com | Site By : SobizTrend
