खबर सर्कल
काठमाडौं । मंगलबार बिहानसम्म देशका प्रमुख नदी तथा सहायक नदीहरूको बहाव सतर्कता तहभन्दा तलै रहेको भए पनि वर्षा जारी रहेकाले जलसतह उल्लेख्य बढ्न सक्ने बाढी पूर्वानुमान महाशाखाले जनाएको छ।
महाशाखाका अनुसार कोसी, नारायणी, बागमती, कर्णाली, महाकाली तथा तिनका सहायक नदीसँगै कन्काई, कमला, बबई, पूर्वी राप्ती र पश्चिम राप्ती नदीको बहाव अहिले सतर्कता तहभन्दा तल छ। तर वर्षाको मात्रा बढेसँगै यी नदीमा पानीको सतहसमेत बढ्न सक्ने भएकाले नदी आसपासका बासिन्दालाई सतर्क रहन आग्रह गरिएको छ।
यसैबीच ताप्लेजुङ, तेह्रथुम, संखुवासभा, सोलुखुम्बु, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, गोरखा, तनहुँ, लमजुङ, कास्की, पर्वत, बागलुङ, म्याग्दी, बझाङ र बाजुरा तथा आसपासका जिल्लाबाट बहने साना नदी तथा खोलामा बहाव उल्लेख्य बढ्न सक्ने पूर्वानुमान गरिएको छ।
यी क्षेत्रमा आकस्मिक बाढीको मध्यम जोखिम रहेकाले नदी, खोला तथा खोल्सानजिक रहेका बस्ती र यात्रुहरूलाई आवश्यक सावधानी अपनाउन महाशाखाले आग्रह गरेको छ।
वर्षाको अवस्था र नदीको जलसतहमा हुने परिवर्तनअनुसार जोखिम थप बढ्न सक्ने भएकाले स्थानीय प्रशासन तथा सम्बन्धित निकायले समेत आवश्यक सतर्कता अपनाउनुपर्ने देखिएको छ।
Source: Nepal Government
© 2026 All right reserved to nepalcircle.com | Site By : SobizTrend
