ललितपुर/ ०५ पुस : बागमती प्रदेशका मुख्यमन्त्री बहादुर सिंह लामाले तीनै तहका सरकारले गरेको विकासका काम जनताले अपनत्व लिनेखालकाे हुनुपर्छ भन्ने बताउनुभएकाे छ ।

ललितपुरको काेन्ज्याेसाेम गाउँपालिकाकाे कार्यालयमा विहिबार गाउँसभाकाे १५ओैं अधिवेशनकाे उद्घाटन गर्नुहुँदै मुख्यमन्त्री लामाले संघ, प्रदेशबाट भएगरेका विकास निर्माणका कामहरु सफलतापूर्वक सम्पन्न गर्दै त्यसको समुचित प्रयाेग र संरक्षणमा स्थानीय तहले ध्यान  दिनुपर्ने बताउनुभएको हाे ।

” हाम्रो एउटा प्रदेशबाट अर्को प्रदेशमा पुग्न ३०-४० किलोमिटरकाे सडकबाटै सम्भव छ, हरेक वर्ष ५ वटा सडकलाई मर्मत गर्याै भने पनि सहजै काम सम्पन्न हुन्छ, स्थानीय, प्रदेश र संघले बजेट राखेर बनाइएका फरकफरक याेजनाकाे मर्मत र संरक्षणमा सबैले ध्यान दिएमा मात्रै गरेको विकासले सार्थकता पाउँछ।” मुख्यमन्त्री लामाले भन्नुभयो ।

उहाँले संविधानले परिकल्पना गरेअनुसार ठूलाठूला विकासका याेजनाका लागि संघ, मध्यम खालका प्रदेश र साना याेजनाका लागि स्थानीय तहले नैफकाम गर्न सक्ने व्यवस्था रहेकाे जानकारी गराउनुभयाे ।

उहाँले विपदजन्य घटनाबाट वचन खाेलाका नजिकमा मानव बस्ती नराख्ने र सबै जना सचेत भएर विपदबाटबच्न काम गर्नुपर्नेमा जाेड दिनुभयो ।

ललितपुर क्षेत्र नं. १ का प्रतिनिधिसभा सदस्य उदय शम्शेर राणाले काेन्ज्याेसाेम गाउँपालिकाकाे समस्याको बारेमा संसदमा आवाज उठाउँदै पर्याप्त बजेट विनियोजनका लागि संघीय सरकारकाे ध्यानाकर्षण गराउने बताउनुभयाे ।

जिल्ला समन्वय समिति ललितपुरका प्रमुख ऋषिदेव फूँयालले जिल्लाकाे समुचित र समानुपातिक विकासकाे लागि आफू निर्वाचित भएदेखि नै आवाज उठाउँदै आएकाे बताउँदै ललितपुरको ग्रामीण भेगकाे सडक सञ्जालकाे विकास, मर्मतसम्भारका लागि संघ र प्रदेशसंग समन्वय गरिरहेकाे बताउनुभयो । उहाँले ललितपुरका तीन वटा गाउँपालिकाहरुकाे पूर्वाधार विकासमा बागमती प्रदेश सरकारले पहिलाे प्राथमिकतामा राखेर बजेट विनियोजन गर्नुपर्ने बताउनुभयो ।

काेन्ज्याेसाेम गाउँपालिकाका अध्यक्ष कृष्णमान लामाले सुशासन र पारदर्शितालाई दायित्वबाेध गर्नेगरी पालिकाका हरेक विकास निर्माण र सामाजिक उत्तरदायित्वका कामहरु गर्ने जानकारी गराउनुभयाे ।